"Druimentaere" is de titel van miene waekelikse column in de edities Remunj en Wieërt van De Limburger. Iddere vriedigmörge geweun inne bös. Veur ederein dae neet in Midde-Limburg woontj (of veur die paar luuj in Midde-Limburg die gein abonnement oppe Limburger höbbe), zeen mien meis recente "druimentaere's" op dees sjtek te laeze. Geweun "columns" aanklikke oppe balk links.

De ieëste 365 columns zeen sinds kort gebunjeldj in 'n book getiteldj (hètj g'r anges verwachtj): "druimentaere: 365 columns, veur idderen daag eine, 'n gans jaor lank".
Es g'r op 't plaetje hie-ónger kliktj, kriegtj g'r alle besjtèlinformatie.

En es g'r get anges wiltj zeen wo ich mich de lèste tied mit bezighaoj, op 3ML is 'ne tied lank maondjeliks 't tv-programma "naobere" te zeen gewaes. 'n Praotprogramma det ich móch presentere euver Limburgstalige muziek en literatuur. Iddere maondj mit gaste die ofwaal get sjoeans gesjreve, ofwaal gezónge höbbe en dao in dit programma get euver kome vertèlle. D'r wórt get meziek gemaaktj en get veurgelaeze oet eige werk. In idder aaflevering ouch 'n waord of oetdrökking vanne maondj. Örges in 't oetzendgebied, wo dae maondj get te doon woor, wórt aan 'n aantal luuj gevraogdj of ze de beteikenis kóste.

Alle oetgezónje aafleveringe kintj g'r nog 'ns naokieke op www.3ml.nl en den "TV gemisj" aanklikke. Of g'r kliktj op 't knuupke "naobere" oppe balk links en g'r vintj alle aafleveringe dao trök. 3ML is euveriges de locale ómreup van 't Leudal en de Maasgouw. Väöl plezeer d'r mit.

Waat kintj g'r verder nog op dees sjtek vinje? Natuurlik get aanwiezinge euver de sjpelling van de Limburgse Taal en get locaal Limburgse dialekte. En tensjlotte 'n aantal sjakels nao sjtekke euver 't Limburgs en euver taal in 't algemein.

Alle tekste op dees sjtek zeen, veur zoeaver ich det nog zuver beheers, in 't Lins gesjreve, aevel ich bön neet vies van sjoean Limburgse wäörd die neet in Lin of zelfs gaaroets neet mieë gehuuërdj waere.

Ich haoj mich aanbevaole veur reacties, suggesties, verbaeteringe, opmerkinge of waat uch nog mieër op 't hert ligktj. 't Maaktj neet oet in welk dialek, zelfs Hollesj moog. Sjtuurtj eure e-pos nao jan.sjure@druimentaere.nl.

Väöl plezeer op dees sjtek,
Jan Sjure.